Դիպլոմներ-«բրենդ»` բուհի շրջանավարտներին

10:17 Yerevan | 6:17 GMT | Tuesday 8 July 2008

Երեկ Երեւանի Բրյուսովի անվան լեզվաբանական համալսարանի 2007-2008թթ. ուստարվա ուսանողները ստացան այն փաստաթուղթը, որի համար նրանցից ոմանք 4-5 տարի ջանք ու եռանդ էին թափել...կամ գուցե չէին էլ թափել: Խոսքն ավարտական վկայականի` դիպլոմի մասին է: Այդ նշանակալի իրադարձության առիթով ԵՊԼՀ ուսանողական խորհուրդն ու Համահայկական երիտասարդական հիմնադրամը հանդիսություն էին կազմակերպել Օպերայի եւ բալետի թատրոնի դահլիճում: ԵՊԼՀ ռեկտոր Սուրեն Զոլյանն իր շնորհավորական խոսքում ասաց, թե իրեն շատ դժվար է ամեն տարի հրաժեշտ տալ բուհն ավարտող հերթական շրջանավարտներին, բայց հպարտ է, որ մեր պետությունն ամեն տարի «տասնյակ որակյալ» մասնագետներով է ապահովվում: «Բրյուսովն» ավարտած լինելն ու այդ բուհի դիպլոմը կրելն, ըստ ռեկտորի, «բրենդ է»: Ռուս մեծ գրողի անունը կրող այդ «բրենդ» բուհն, ըստ Զոլյանի, իր ուսանողներին ապահովում է ժամանակակից աշխարհում ամենապահանջարկված ռեսուրսով` գիտելիքներով: Ռեկտորը համոզված հայտարարեց, թե այն հիմնավոր գիտելիքները, որոնցով իր ուսանողներին զինում է բուհը` «լիովին բավարարում են գիտելիքի վրա հիմնված հասարակության պահանջները»: Օտար լեզուների ֆակուլտետի դեկան Լուսինե Ֆլջյանը օրվա հերոսներին ու հերոսուհիներին մաղթեց անգլիական նպատակասլացություն, գերմանական ճշտապահություն, իսպանական եռանդ, հունական խոհեմություն, չինական իմաստնություն, հայկական աշխատասիրություն եւ տարբեր ազգերին հատուկ այլեւայլ «ություն»-ներ: Լեզվաբանության եւ միջմշակութային հաղորդակցության ֆակուլտետի դեկան Հարություն Ճանճապանյանն ասաց, որ իր համար պատիվ է դիպլոմներ հանձնել այն ուսանողներին, որոնք հաստատապես պահպանելու են «լեզվաբանական մեծ դարբնոց» համարվող բուհի պատիվն ու համբավը: Մաղթանքներով հանդես եկան նաեւ բուհի մյուս դեկանները, բոլորն էլ կրկնվող ցանկություններով առ շրջանավարտներ` հաջողություններ, հասարակությանն իրենց գիտելիքներով ծառայելու պատրաստակամություն, նվաճումներ գիտության բարձունքներում... եւ իհարկե` կանաչ ճանապարհ: Ի դեպ, դիպլոմների հանձնման արարողությունը մեջընդմեջ ընդմիջվում էր հայկական էստրադայի ոչ այնքան հայտնի երգիչ-երգչուհիների հաջողված եւ ոչ այնքան հաջողված կատարումներով: Ի դեպ, հանդիսությունը վարում էր Հրանտ Թոխատյանը, ով, պարզվում է, եւս բրյուսովցի է եւ 27 տարի առաջ ավարտել է ռուսաց լեզվի եւ գրականության ֆակուլտետը: Հավանաբար դա էր պատճառը, որ պարոն Թոխատյանը հաճախ էր կրկնում, որ իրեն զգում է ինչպես հարազատ տանը, ծանոթ հումորներ անում. «Տղերք ջան, մենք քիչ ենք, բայց էդ էլ է մեզ շատ»` նկատի ունենալով բուհի արական սեռի ներկայացուցիչ ուսանողների սակավությունը, ապա նաեւ մխիթարում իր ցեղակիցներին` ասելով` «բրյուսովցի ենք, բրյուսովցի, ով կարա մեզ հետ մրցի»: Միայն բրյուսովցի լինելը, կարծում ենք, մրցության համար բավարար հիմք ու առիթ չէ, կարեւորն այս դեպքում, ինչպես քիչ վերն ասվեց` ժամանակակից աշխարհում ամենապահանջարկված ռեսուրսով` գիտելիքներով զինված լինելն է: Թե չէ` բրյուսովցի~, պոլիտեխնիկցի~, համալսարանցի~...

Շրջանավարտները հանդիսության վերջում երդվեցին լինել «ազգի եւ հայրենիքի արժանի զավակը», իրենց գիտելիքները, կամքն ու ձգտումները փոխանցել հաջորդ սերունդներին` անդավաճան մնալով հարազատ բուհին:

Դիպլոմների հանձնման արարողությունից հետո զրուցեցինք բրյուսովցիներից մի քանիսի հետ: Բոլորն էլ խանդավառված էին, ոմանք այն աստիճան, որ աջ ու ձախ համբույրներ բաշխելուն զուգահեռ նաեւ ֆոտոմոդելի կեցվածք ընդունած լուսանկարվում էին, ոմանք էլ...ցատկոտում: ԵՊԼՀ լեզվաբանության եւ միջմշակութային հողորդակցության ֆակուլտետի միջազգային լրագրության բաժնի (բաժինն այս տարի 21 լրագրող է ավարտել) ուսանող Աստղիկ Սարգսյանը պատրաստակամ է աշխատել լրագրության ոլորտում, բայց նաեւ մեծ ցանկություն ունի դասախոսել բուհում եւ քիչ վերը մեջբերված երդման տեքստի համաձայն իր գիտելիքները փոխանցել հաջորդ սերունդներին: Աստղիկն, ի դեպ, արդեն մամուլի հետ համագործակցության փորձ ունի, բացի այդ էլ` պատմվածքներ է գրում: Նույն բաժնի մեկ այլ շրջանավարտ` Արուսյակ Գեղամյանը պատրաստվում է «ներխուժել» լրագրության դժվար ու միաժամանակ հրապուրիչ աշխարհ, եթե գտնվի չեզոք ու անկողմնակալ լրատվամիջոց: Հենց այդպիսի լրատվամիջոցում աշխատելու ցանկություն ունեն նաեւ Անի Միքայելյանը, Լուսինե Հովհաննիսյանը, Էմիլյա Սողոմոնյանը, Լիլիթ Առաքելյանը, Միլենա Պետրոսյանը, Նարինե Բանդարյանը, Գատյան Լիլիաննան: Եվգենյա Կազումյանն իր` դիպլոմ ստանալը համարեց կարեւոր նվաճում, նա հեռուստալրագրողի 4 տարվա փորձ ունի: Եվգենյան ուզում է ուսումը շարունակել մագիստրատուրայում, որից հետո նորից կաշխատի որպես լրագրող, քանի որ իրեն չի պատկերացնում այլ ոլորտում: Անուշ Գեւորգյանը մեծ ցանկություն ունի աշխատել հեռուստատեսությունում` որպես հաղորդավար: Կարծում ենք` Անուշը կհաջողի, հրապուրիչ արտաքին ու ձայն ունի: Անշուշտ կհաջողեն այս տարվա բոլոր շրջանավարտները եւս:

Հ.Մ.

ուրբաթ, 21 դեկտեմբեր 2008

Դիպլոմներ-«բրենդ»` բուհի շրջանավարտներին

10:17 Yerevan | 6:17 GMT | Tuesday 8 July 2008

Որոնում

Արխիվ

Վերլուծական

«Շվեդական մոդելի» էությունը

Քաղաքական

Իշխանության քիլերը

Աշխարհ

Գլոբալիզացիան շարունակվում է