ԵԱՀԿ ՄԽ-ի համանախագահները գալիս են

11:39 Yerevan | 7:39 GMT | Wednesday 25 June 2008

Էմմա Գաբրիելյան

Հունիսի 25-27-ը ԵԱՀԿ Մինսկի խմբի համանախագահները տարածաշրջան են այցելելու. նախնական տեղեկությունների համաձայն` հունիսի 25-ին միջնորդները կայցելեն Ադրբեջան, իսկ երկու օրից Բաքվից կժամանեն Երեւան: ԵԱՀԿ ՄԽ-ում ֆրանսիացի համանախագահ Բեռնար Ֆասիեի փոխանցմամբ` Երեւանից համանախագահները մեկնելու են Մոսկվա, որտեղ մի շարք հանդիպումներ են ունենալու:

Այնուհետեւ Վիեննայում անց է կացվելու ԵԱՀԿ Մինսկի խմբի ընդլայնված կազմի հանդիպումը, որտեղ միջնորդները ներկայացնելու են իրավիճակը հակամարտության կարգավորման բանակցային գործընթացում եւ տարածաշրջան կատարած իրենց այցելության արդյունքները:

Օրերս Կովկասում ԱՄՆ-ի քաղաքականությանը նվիրված լսումներում ԱՄՆ-ի պետքարտուղարի տեղակալ Դենիել Ֆրիդը Կոնգրեսի Ներկայացուցիչների պալատի արտաքին գործերի հանձնաժողովում անդրադարձել էր նաեւ ղարաբաղյան հակամարտության կարգավորման թեմային: Ամերիկացի պաշտոնյան վստահեցրել է, թե Ադրբեջանը չի պատրաստվում պատերազմի. «ԱՄՆ-ը հուսով է, որ Ադրբեջանի կառավարությունը կկարողանա ընդդիմանալ այն կարծիքին հակվելու գայթակղությանը, որ ԼՂ հիմնախնդիրը լուծելու համար ռազմական գործողությունների վերսկսումը իրագործելի տարբերակ է»: Շեշտելով, որ ԱՄՆ-ը շարունակում է ակտիվ ջանքեր գործադրել հիմնախնդրի խաղաղ լուծմանը հասնելու համար` Դ.Ֆրիդը ընդգծել է, որ ԱՄՆ-ը պաշտպանում է Ադրբեջանի տարածքային ամբողջականությունը եւ գտնում է, որ ԼՂ-ի վերջնական կարգավիճակը պետք է որոշվի բանակցությունների ու փոխզիջումների ճանապարհով` միջազգային իրավական ու քաղաքական սկզբունքներին համահունչ: Դ.Ֆրիդը կարծում է, որ հունիսի 6-ին Սանկտ Պետերբուրգում տեղի ունեցած Իլհամ Ալիեւ-Սերժ Սարգսյան առաջին հանդիպմանը նրանց կողմից «կարեւոր առաջընթաց քայլ արվեց հակամարտության կարգավորման ուղիները քննարկելու համար»: «Երկու կողմերը հավաստեցին Մինսկի գործընթացի շրջանակներում աշխատանքները շարունակելու կողմնակցությունը եւ պատրաստակամություն հայտնեցին՝ շարունակել Մինսկի խմբի օժանդակությամբ պատրաստված փաստաթղթի հիմնարար սկզբունքների քննարկումը», - ասել է ԱՄՆ պետքարտուղարի տեղակալը: «Այն ժամանակ, երբ Ադրբեջանի` նավթից ու գազից ստացված եկամուտները շարունակում են հետեւողականորեն աճել, մենք շարունակում ենք այդ միջոցները ներկա ու ապագա սերունդների օգտին խելամիտ օգտագործելու կոչեր անել երկրի ղեկավարությանը: Մենք հույս ունենք, որ Ադրբեջանի ղեկավարությունը կխուսափի այն գայթակղիչ մտածելակերպից, թե ռազմական գործողությունները վերսկսելը կենսունակ տարբերակ է: Մենք հայտնել ենք մեր անհանգստությունն ադրբեջանցի որոշ պաշտոնյաների համառ ռազմատենչ հայտարարությունների կապակցությամբ», - հայտարարել էր Դենիել Ֆրիդը:

ԵԱՀԿ ՄԽ-ի համանախագահների տարածաշրջան կատարելիք այցից առաջ Ադրբեջանի նախագահ Իլհամ Ալիեւը թե իր պետության, թե տարածաշրջանի համար թիվ մեկ խնդիր է մատնանշել ղարաբաղյան հակամարտությունը, ապա հիշեցրել, որ Ադրբեջանի «գրավյալ» տարածքների ազատագրումը պահանջող ՄԱԿ-ի չորս բանաձեւերը մինչ օրս չեն կատարվել. «Վերջերս ՄԱԿ-ի գլխավոր վեհաժողովում բանաձեւ ընդունվեց Ադրբեջանի գրավյալ տարածքներում տիրող իրավիճակի վերաբերյալ: Մեր դիրքորոշումը պաշտպանում են «Իսլամական կոնֆերանսի» կազմակերպությունը, Եվրախորհուրդը, ԵԱՀԿ-ն եւ այլ միջազգային կազմակերպություններ: Միլիոնավոր ադրբեջանցի փախստականներ ու տեղահանվածներ մինչ օրս զրկված են տարրական մարդկային իրավունքներից», - ասել է Ադրբեջանի նախագահը: Ի.Ալիեւը միաժամանակ վստահեցրել է, թե իր երկրի տարածքային ամբողջականությունը ապահովվելու է. «Այդ հարցի կարգավորման գործընթացում մեր կողմից զիջում կարող է լինել միայն LՂ-ին ամենաբարձր ինքնավարության տրամադրումը: LՂ-ի հակամարտությունը վտանգ է ներկայացնում ոչ միայն Ադրբեջանի, այլեւ ողջ տարածաշրջանի համար: Ադրբեջանը հաջողությունների է հասել բոլոր ոլորտներում, մեր կողմից է նաեւ միջազգային իրավունքը, եւ մենք հավատում ենք, որ հնարավոր կլինի կարգավորել խնդիրը խաղաղ ճանապարհով», - հայտարարել է Ադրբեջանի ղեկավարը:

Օրերս նաեւ Հայաստանի ԱԳ նախարար Էդվարդ Նալբանդյանն է անդրադարձել ղարաբաղյան հիմնախնդրին: Նա նշել է, որ հակամարտության հիմքում ԼՂ ժողովրդի ինքնորոշման իրավունքի ճանաչման եւ իրականացման հարցն է եւ Հայաստանը գտնում է, որ ԼՂ հիմնախնդրի կարգավորումը պետք է հիմնված լինի հետեւյալ սկզբունքների վրա` ԼՂ-ն չի կարող լինել Ադրբեջանի ենթակայության տակ, պետք է անխափան ու հայկական կողմի իրավազորության տակ գտնվող ցամաքային կապ ունենա Հայաստանի հետ, եւ ԼՂ-ի բնակչության անվտանգությունը պետք է երաշխավորված լինի. «Այս սկզբունքների ընդունումն ու պայմանագրային ամրագրումը հնարավորություն կընձեռեն վերացնել հակամարտության հետեւանքները», - ասել է ՀՀ արտգործնախարարը` կարծիք հայտնելով, որ այս ուղղությամբ ձեռք բերված պայմանավորվածությունները պետք է ղարաբաղյան կողմի հավանությանը արժանանան:

Է.Նալբանդյանը հայտարարել է, որ «ադրբեջանական կողմից ամենաբարձր մակարդակով ռազմատենչ քարոզչությունը եւ սպառնալիքները հիմնախնդրի հնարավոր ռազմական լուծման վերաբերյալ հակասում են ՄԱԿ-ի կանոնադրությանը եւ ԵԱՀԿ հիմնարար փաստաթղթին` 1975թ. Հելսինկիի եզրափակիչ ակտին, միջազգային իրավունքի հիմնարար սկզբունքներին»: «Ռազմական ճանապարհով հակամարտության կարգավորման ցանկացած փորձ կարող է անկանխատեսելի հետեւանքներ ունենալ ոչ միայն հակամարտության կողմերի, այլեւ ողջ տարածաշրջանի համար», - նշել է ՀՀ ԱԳ նախարարը` նկատելով, որ ներգրավված լինելով ԵԱՀԿ ՄԽ-ի բանակցային գործընթացում` «Ադրբեջանը զուգահեռաբար փորձում է ղարաբաղյան հիմնախնդրի կարգավորումը տեղափոխել այլ միջազգային ատյաններ, շարունակում է միջազգային կազմակերպություններում հակամարտության էության խեղաթյուրումը եւ Հայաստանի դեմ ուղղված քարոզչությունը: Դա զգալիորեն խոչընդոտել եւ խոչընդոտում է հիմնախնդրի կարգավորմանը»:

ուրբաթ, 21 դեկտեմբեր 2008

ԵԱՀԿ ՄԽ-ի համանախագահները գալիս են

11:39 Yerevan | 7:39 GMT | Wednesday 25 June 2008

Էմմա Գաբրիելյան

Որոնում

Արխիվ

Վերլուծական

«Շվեդական մոդելի» էությունը

Քաղաքական

Իշխանության քիլերը

Աշխարհ

Գլոբալիզացիան շարունակվում է