Տեր-Պետրոսյանն իր մասնակցությամբ բացառիկ է դարձնում ցանկացած միջոցառում

18:42 Yerevan | 14:42 GMT | Saturday 4 October 2008

Հեղինե Մանուկյան

«Տեղի ունեցածն ընդամենը նման էր իմիտացիայի, որովհետեւ նախագահի ուղերձն ընդամենը բարի մտադրությունների մի ամբողջ ցանկ էր: Բարի մտադրությունները որեւէ մեկը չի վիճարկում: Նրա ուղերձում կան ճշմարտություններ, որոնք կարող է կրկնել ցանկացած մարդ:

Այլ խնդիր է` հասարակությունն ինչ ակնկալիք ուներ այդ ուղերձից», - նախօրեին ժողովրդին ու ԱԺ-ին ուղղված Ս.Սարգսյանի ուղերձին երեկ «Տեսակետ» ակումբում այսպիսի որակում տվեց «Հանրապետություն» կուսակցության քաղխորհրդի անդամ Սուրեն Սուրենյանցը: Ապա հավելեց. «Եթե մենք սիրողական մակարդակով սոցիոլոգիական հարցում անցկացնենք, կհամոզվենք, որ հասարակությունը, եթե սպասելիք էլ ուներ այդ ուղերձից, ակնկալում էր համաներման մասին հայտարարություն: Այսինքն` ինչ էր սպասում լսել հասարակությունը եւ ինչ լսեց, կարծում եմ, ադեկվատ չէր: Երկրի առաջին դեմքը պետք է անսա հասարակական տրամադրություններին, ուղերձը պետք է ուղղված լինի քաղաքական եւ հասարակական համերաշխությանը, պետության առջեւ կանգնած առաջնային խնդիրների ամրագրմանը»: «Տեսակետի» հյուրը նկատեց, որ Ս.Սարգսյանի ուղերձից բացարձակապես չի երեւում, որ երկրում կան կալանավորներ, եւ որ տեղի է ունեցել մարտի 1: «Եթե մենք ապրեինք այլ երկրում, ստանդարտ իրավիճակներում, գուցե ուղերձի բովանդակության դեմ որեւէ ասելիք չլիներ, բայց մենք ապրում ենք այսօրվա Հայաստանում, որտեղ հաղթահարված չեն մարտի 1-ի հետեւանքները, կան բազում խնդիրներ, որոնց Ս.Սարգսյանը պարտավոր էր անդրադառնալ», - ասաց բանախոսը: Վերջինս նաեւ հակադարձեց Ս.Սարգսյանի ուղերձում նշված այն դիտարկմանը, թե պատրաստվում է առաջիկայում երկրի համար կենսական ու ռազմավարական նշանակություն ունեցող հարցերի շուրջ պարբերաբար խորհրդակցություններ նախաձեռնել եւ հրավիրել կուսակցությունների ղեկավարներին. «Ս.Սարգսյանն իր հոգու խորքում գիտի, որ քաղաքական էլեկտորատի 80 տոկոսը գտնվում է խորհրդարանի պատերից դուրս եւ նման դեպքերում շատ կուզենա արտախորհրդարանական ուժերի հետ աշխատել: Մենք նման սխեմայով համագործակցություն չենք պատկերացնում: Խնդրեմ` մենք առաջարկել ենք լուծման տարբերակ` ԱԺ ու նախագահի արտահերթ ընտրություններ: Եթե իշխանությունները գտնում են, որ առկա լարվածությունը կարող է լուծվել այլ տարբերակով, մենք պատրաստ ենք լսել նաեւ նրանց առաջարկները: Որպեսզի վիրտուալ չլինի, թող կոնկրետ բան ասեն` ինչպե՞ս են պատկերացնում արտախորհրդարանական ուժերի հետ համագործակցությունը: Գուցե դա հնարավոր լիներ, եթե մենք չունենայինք կալանավորված ընկերներ: Նախ պիտի ազատության մեջ լինեն մեր բոլոր ընկերները, որից հետո կարելի է մտածել համակեցության, համագործակցության, երկխոսության եւ նման այլ բաների մասին»: Անդրադարձավ նաեւ հոկտեմբերի 17-ի հանրահավաքին. լրագրողներից մեկը հարցրեց` ինչպիսի՞ն է լինելու այն` «վճռակա՞ն», «բացառի՞կ», թե՞...: Սուրենյանցն ասաց, որ ինքն այն քաղաքական գործիչներից է, որը երբեք հանրահավաքը չի որակում «բացառիկ», «վճռական» կամ այլ մակդիրներով, միաժամանակ արձանագրելով. «Ցանկացած միջոցառում, որին կմասնակցի Լեւոն Տեր-Պետրոսյանը` այդ միջոցառումն ինքնին բացառիկ կլինի, այսինքն` այդ կալիբրի քաղաքական գործչի մասնակցությունը որեւէ միջոցառման դրան հաղորդում է բացառիկություն»: Ս.Սուրենյանցն ասաց նաեւ, որ Համաժողովրդական Շարժման պայքարի նշանաբանը շարունակելու է մնալ անփոփոխ, գլխավոր խնդիրը նույնպես` անցկացնել արտահերթ նախագահական ու խորհրդարանական ընտրություններ: Ինչ վերաբերում է տակտիկական հնարքներին. «Կգա հոկտեմբերի 17-ը, եւ Լ.Տեր-Պետրոսյանն ինքը կբացահայտի պայքարի նոր ռազմավարությունը կամ ռազմավարական որոշակի նրբերանգներ»:

Անդրադարձ եղավ նաեւ նախօրեին ԵԽԽՎ մոնիտորինգային հանձնաժողովի կողմից ընդունված կոշտ հայտարարությանը` կապված ԵԽԽՎ 1609 եւ 1620 բանաձեւերի հետ: Ս.Սուրենյանցն այս առիթով նկատեց, թե այդ հայտարարության մեջ ամրագրվել են բոլոր այն խնդիրները, որոնց մասին ընդդիմությունը բարձրաձայնում է ամիսներ շարունակ, որ «առնվազն 19 դատավարություն կա, որտեղ գործերը թխվել են միայն ոստիկանական ցուցմունքների հիման վրա, որ նախաքննությունը արհեստականորեն երկարում է, որ կան քաղաքական հայացքների համար կալանավորված անձինք եւ այլն»: Բանախոսը նկատեց, թե «այդ մոնիտորինգից հետո ՀՀ իշխանությունները պետք է հասկանան, որ Ստրասբուրգում իրենց հետ չեն պատրաստվում խաղ անել եւ հետեւելու են պատժամիջոցներ: Պարտադիր չի, որ դա լինի ՀՀ-ի քվեարկելու ձայնի սառեցման տարբերակով, որը ՀՀ-ին բերելու է աննախանձ վիճակի»: Ս.Սուրենյանցը հարկ համարեց եւս մեկ անգամ շեշտել, որ ընդդիմությունն իր քաղաքական օրակարգը ձեւավորում է անկախ որեւէ երկրի կամ միջազգային կազմակերպության արձագանքից: «Ի վերջո` ԵԽ-ն պետք է ավելի շատ մտահոգ լինի, որպեսզի Հայաստանի իրավիճակին ադեկվատ գնահատականներ տա: Կա ԵԽ-ի հեղինակության խնդիր. ինչքան իրենք անաչառ լինեն, այնքան հասարակության մոտ ԵԽ-ի վերաբերյալ կարծիքը բարձր կլինի: Մենք մեր քաղաքական գործունեությունը կառուցում ենք հաշվի առնելով մեր հասարակության տրամադրությունները: Իհարկե արտաքին գործոնները մեր տակտիկայի վրա որոշակի ազդեցություն ունենում են, եւ մենք դրանք անտեսել չենք կարող», - հայտարարեց «Հանրապետություն» կուսակցության քաղխորհրդի անդամը:

ուրբաթ, 21 դեկտեմբեր 2008

Տեր-Պետրոսյանն իր մասնակցությամբ բացառիկ է դարձնում ցանկացած միջոցառում

18:42 Yerevan | 14:42 GMT | Saturday 4 October 2008

Հեղինե Մանուկյան

Որոնում

Արխիվ

Վերլուծական

«Շվեդական մոդելի» էությունը

Քաղաքական

Իշխանության քիլերը

Աշխարհ

Գլոբալիզացիան շարունակվում է